Para seren admitidas e participar na convocatoria do presente proceso selectivo de estabilización, as persoas aspirantes deberán reunir os requisitos básicos e xerais sinalados a continuación:

• Ter a nacionalidade española ou algunha outra que, con arranxo ao disposto no art. 57 do Texto Refundido da Lei do Estatuto Básico do Empregado Público (TREBEP) e no art. 52 da Lei 2/2015, de 29 de abril, de Emprego Público de Galicia (LEPG) e restante normativa concordante, permitan o acceso á praza convocada.
• Posuír as capacidades e aptitudes físicas e psíquicas que sexan necesarias para o desempeño das correspondentes funcións ou tarefas.
• Ter cumpridos os dezaseis anos de idade e non exceder, se é o caso, da idade máxima e xeral de xubilación forzosa, sen prexuízo daqueloutras concretas previsións e idades aplicables no seu caso e segundo a praza convocada, consonte a normativa específica/sectorial de referencia.
• Posuír as titulacións que para cada praza se requiran nas respectivas convocatorias e bases específicas, ou estar en condicións de obtelas antes do remate do prazo de presentación de solicitudes de participación. No caso de que as ditas titulacións se obtivesen no estranxeiro, deberase ter concedido a correspondente credencial de homologación segundo a normativa vixente ao respecto.
• No caso de prazas de persoal funcionario, non estar separada ou separado mediante expediente disciplinario do servizo de ningunha administración pública, nin atoparse en situación de inhabilitación para emprego ou cargo público de carácter absoluto ou especial que imposibilite a ocupación e desempeño da praza. No caso de prazas de persoal laboral, non ter sido despedido/a mediante expediente disciplinario de ningunha administración pública, nin atoparse en situación de inhabilitación para emprego ou cargo público de carácter absoluto ou especial que imposibilite a ocupación e desempeño da praza convocada. No caso de ser nacional doutro Estado, non atoparse inhabilitado/a ou en situación equivalente nin ter sido sometido/a a sanción disciplinaria ou equivalente que impida, neste Estado, nos mesmos termos, o acceso ao emprego público.
• Estar en posesión do CELGA, ou acreditación do coñecemento de lingua galega equivalente que, para cada praza, se requira nas correspondentes convocatorias e bases específicas; ou estar en condicións de obtelo antes do remate do prazo de presentación de instancias. A dita acreditación do coñecemento de lingua galega realizarase de conformidade ao previsto na normativa de aplicación; con arranxo ao Sistema de Certificación de Lingua galega (CELGA) actualmente vixente, ou as súas certificacións equivalentes, debidamente homologadas polo órgano competente en materia de política lingüística da Xunta de Galicia (nos termos da Orde de 16 de xullo de 2007 e da Orde de 10 de febreiro de 2014, que modifica a anterior). En todo caso, e con arranxo ao previsto no art. 51.2 da Lei de emprego público de Galicia, os/as aspirantes que non acrediten o anterior, deberán realizar unha proba de conformidade coa base 5.5.
• Cumprir cos requisitos legais aplicables en cada momento para o acceso a profesións, oficios e/ou actividades que impliquen contacto habitual con menores. Así, e de conformidade co art. 13.5 da Lei Orgánica 1/1996, do 15 de xaneiro, de protección xurídica do menor, será requisito para o acceso a profesións, oficios e/ou actividades que impliquen contacto habitual con menores e o seu exercicio, non estar condenado por sentenza firme por algún delito contra a liberdade e indemnidade sexual. Aos ditos efectos, para prazas comprendidas nas anteditas profesións, oficios e/ou actividades, as persoas aspirantes deberán acreditar non ter sido condenado por ningún dos delitos anteditos mediante certificación negativa emitida polo Rexistro Central de delincuentes sexuais.
• Ter ingresado na conta bancaria do Concello de Bergondo, IBAN ES95 2080 0045 9831 1000 0071 a taxa fixada como dereitos de exame, de conformidade coa base 7ª das bases xerais da convocatoria.
• Aqueloutros requisitos/condicións concretos de participación que, de ser o caso, e por razón das características/natureza das prazas e/ou da normativa específica ou sectorial aplicable, se poidan fixar nas respectivas convocatorias e bases específicas, adecuándoas, no que proceda, ao previsto nas Bases xerais da convocatoria.

Tódolos requisitos indicados deberán posuílos os aspirantes o día que remate o prazo para presentar as solicitudes e conservalos na data do seu nomeamento como persoal funcionario de carreira ou formalización da contratación do persoal laboral fixo.